Just Life

والله حاجة تقرف الواحد مش لاقي حد يتكلم معاه ,مش عشان مفيش حد

لا الناس كتير واللي عايز يسمع اكتر بس مفيش حد بصراحة يستاهل

مش هقول بقى الناس وحشة وبتوع مصلحتهم .. لالا اكيد انتوا عارفين من غير ما اقول

ومش كل واحد بقى يسمعلي الجملتين دول يقولي" اه والله عندك حق الناس بقيت وحشة "

هو انا يعني بتكلم عن ناس تانية من كوكب تاني ما انا بتكلم عن الناس اللي قابلتها وعرفتها يعني

اكيد بتكلم عنكم ,, وبرضه محدش يقولي "على اساس بقى انك الملاك البريء اللي مش من الناس دي"

هرد عليه واقوله لا طبعاً انا مش ملاك بس بريئة يعني ماليش في اللف والدوران ولما ببقى عايزة

اعمل حاجة بعملها ولو عايزة اقول حاجة بقولها

نرجع بقى لموضوعنا

اللي خلاني اقول الكلام ده دلوقتي ان الموضوع بقى اوفر اوي ..مهو يعني الناس الوحشة دي

موجودة من زمان دي حاجة مش جديدة بس دلوقتي بقوا كتير اوي ده لو مكنش كل الناس كدة

كل الموضوع ان كل ما اعرف واحدة واقول بس هيا دي بقى الصديقة بجد وهتبقى هيا دي انتيمي

شوية والاقي العيوب ابتدت تظهر بقى . انا عارفة ان كل الناس فيها عيوب واكيد انا كمان من الناس

دي , بس في عيوب نقدر نستحملها وعيوب ما نقدرش

وانا بقى ما شاء الله باجي مع الناس اللي عيوبها مش بقدر اتحملها واللي يدهش بقى ان انا على قد

ما اقدر بحاول اقدر الموقف واتحمل العيوب دي شوية شوية في الاول كدة وعلى الرغم من كدة لو

عملت موقف واحد ضايق اللي قدامي يفضل بقى شايلها ويطلع فيا عيوب الدنيا "ده على موقف عبيط

مش زي المواقف اللي كان بيعملها "

انا على فكرة مش بتكلم على حد معين بس سبحان الله الصفة دي موجودة في كل الشخصيات اللي

قابلتها وقولت هيبقوا اصحابي , تقولوش محظوظة من يومي

مشكلة حياتي بقى اني ممكن استحمل اللي قدامي شوية لو كان حد غالي عندي بس برضه مش كتير

وده طبعاً يرجع لاني شخصية حساسة زيادة عن اللزوم وبشكل بصراحة مؤرف , ولاني برضه

عصبية وبتنرفز بسرعة اوي على حاجات عبيطة

ولو حد عادي يعني وعمل معايا حركة نص كوم ولا حاجة من هذا القبيل لا مع الف سلامة ومن غير

ما أُبدي اي اسباب ويفهم اللي يفهمه المهم اني قفلت من ناحيته

احكيلكم بقى اصل عقدة الاصحاب عندي دي ايه ... كل الموضوع اني زي ما قولتلكم فوق كدة كل ما

اقابل واحدة نبقى ماشيين حلو اوي واصحاب وتمام وفجأة تظهر العيوب واحدة واحدة بقى

في الاول كنت ممكن اتفاجيء بتصرف او حركة ندالة كدة فكنت بتصدم وزي ما تقولوا كدة حاجة

اتكسرت بيني وبينها ومش هعرف ارجع معاها زي الاول وانا ما بحبش ابقى متحفظة كدة في

معاملتي مع اصحابي فـ باخدها من قاصرها وافركش انا العلاقة

واتكرر الموقف ده مع كذا حد .. لحد ما جه عليا وقت ولما الاقي واحدة وخلاص هنبقى اصحاب ,

اروح كدة زي الشاطرة اقولها بصي انا بزعل من كذا وكذا فـ بلاش يحصل بينا , ونتفق منعاً للفركشة يعني

بس للأسف كانت برضه بتحصل لاسباب اخرى ما بكونش انا بقى عاملة حسابها

يعني يمكن اخر مشكلتين قابلوني مع اصحابي او اللي كانوا اصحابي يعني

واحدة تقريباً كانت معقدة نفسياً او حاجة شبه كدة بصراحة يعني انا ما فهمتهاش

والتانية ما شاء الله كانت كدابة كدب الدنيا ..بتعشق الكدب وبتحس بلذة كدة وهيا بتخترع قصص

وتفرح اكتر بقى لما تحس ان اللي قدامها صدقها " شربها يعني "

كانت بتصعب عليا برضه والله , اصل بيقولك الغبي اللي فاكر نفسه اذكى واحد

بعد كدة قولت بس شكراً على كدة بلا اصحاب بلا بتاع خلينا في كليتنا مع نفسنا لحد ما نخلص وربنا

يكرمنا بعد كدة بشغل يمكن نقابل ناس كويسة او ما نقابلش مش هتفرق كتير

ييجي بقى الواحد يتحرق دمه مع الناس اللي معاه في الكلية , اكيد معظمكم عارف اللي اقصده

هقولكم برضه لو مش عارفين ,, عندنا مثلاً كل النماذج الوحشة اللي ممكن تقابلوها

كدب تلاقي , خبث تلاقي , حقد تلاقي , مصلحة تلاقي كتير بقى

بصوا لو هنتكام عن الدراسة والمنافسة مطلوبة والحاجات دي بتبقى نتيجة المنافسة والكلام ده ,

اوك هنعديه ونعتبره مش مقصود " مع انه مش منطقي يعني بس مش هزعلكم "

هقولكم بقى على مثل كدة بعيد عن الدراسة .. ناس معانا في الكلية فيهم خبث الدنيا انا اول واحدة

كنت بدافع عنهم واول واحدة اتصدمت فيهم .. لما يعوزوا منك حاجة يقلبوا الدنيا عليك لحد ما

ياخدوا اللي هما عايزينه ولما يعرفوا حاجة يشيلوها لنفسهم ولما تعاتبهم يقولوا ما انت مكنتش موجود

الغريب بقى في الموضوع ده اني كنت اول ما اسمع عن حاجة كويسة او مفيدة اورح اقولهم اول

ناس , ولو كنت مشتركة في حاجة بره الكلية او بنظم لحاجة كنت برضه بقولهم قبل اي حد واكتشف

بقى بعد كدة انهم بيعملوا كل حاجة من غير حتى ما يفكروا يقولولي

واللي يضحك بقى انهم راحوا يسألوا على رحلات في الجامعة ولما ما لقوش باعتين يقولولي

اشوفلهم رحلات .. يعني لو كانوا لقوا في الجامعة كانوا راحوا ولا حتى جابولي سيرة ولا كنت هعرف

تفتكروا ناس زي دي ايه اللقب المناسب اللي ممكن يتقال عليهم ؟؟

بصراحة ما حاولتش ادورلهم على لقب مناسب ليهم لانهم ما يستاهلوش اشغل تفكيري بيهم هما اقل

من كدة .. وانتوا كمان ما تفكروش

يمكن انا كنت من انصار شعار "بص لنفسك الاول قبل ما تبص لغيرك " ومكنتش احب اقول عيوب

غيري عشان عارفة ان انا كمان فيا عيوب

بس بصراحة بقى انا قعدت ادور فيا على عيوب تعادل العيوب اللي في الناس دي ما لاقيتش

انا يمكن عيوبي كلها بتأثر عليا مش عليهم .. يعني العصبية والحساسية الزيادة واني كتومة شوية

ومش كل حاجة اقولها" في حاجات بحب احتفظ بيها لنفسي "

لو هعتبر ان دي عيوبي او يعني العيوب اللي انا شايفاها فيا , ما اعتقدش ان العيوب دي بتضر حد غيري

ما انكرش ان في ناس بحبهم بس هما برضه مش قريبين مني لدرجة اني اقول عليهم انتيمي

اقولكم بصراحة .. انا مش لاقية حد يستاهل عشان اقول عليها صاحبتي اوي يعني اصحابي .. بعد كل

اللي حكيته ده انا بصراحة توصلت لحاجة

انا حاسة اني احسن من كل اللي حكيتلكم عنهم دول وان مفيش حد فيهم يستاهل يبقى من اصحابي

وانا ما احبش ان يكون حد فيهم من اصحابي

ده مش غرور .. لان مش طبعي الغرور بس دي الحقيقة واكيد هما كمان حاسين بـ ده

او عادي مش حاسين لانهم فاقدين الاحساس ...

كفاية بقى كلام عليهم خدوا اكتر من وقتهم كتير ..